كلام فى الانتخابات

عمرو أبوشادى · **مرسل:** الأربعاء يناير 24, 2018 10:43 pm

منذ الامس و تتوالي علينا عشرات الرسائل المليئه بالتساؤلات عن بيان القياده العامه للجيش المصري بالامس الخاص بالسيد سامي عنان ... فـ مقال اليوم حيكون هااام جدا و كاشف لبعض الامور .... اللى حنبعد بيها عن تفاصيل التحقيقات نظرا لحظر النشر .... و لكن حنتكلم بشكل عام و حـ نطلع نبص من فوق شوية زي ما اتعودنا... و نفكك الصورة لنعيد تجميعها مره اخرى .... فنعتذر ان المقال حيكون مركز شوية ..... و طويل حبتين .... و محتاج كوباية الشاي بتاعتنا اللى اتعودنا عليها .... و ندخل على الموضوع مباشرةً و بالراحه كده و واحده واحده مع بعض.
.
و نبدأ بـ 3 أسئله مباشرين اللى اجابتهم حتوضح ليكم أصل الموضوع و يعرفنا ايه اللى كان مترتب لينا و ايه اللى حنشوفه الفتره اللى جايه و حنعمل معاه ايه ....
.
1- يا ترى هو الفريق سامي عنان او حتي الاخ خالد علي او غيرهم .... مقتنعين ان اي حد فيهم عنده فرصه للفوز في الانتخابات القادمه و يقدر اي حد فيهم ياخد كتله تصويتية تتعدي الـ 13 او 14 مليون ناخب ؟؟؟
.
2- طب هل يا ترى شوفنا حد موجود على الساحه ليه تواجد في الشارع او فيه قواعد جماهيريه حقيقيه مش الموجوده في العالم الافتراضي على النت و لايكات الفيس بوك و قدر حتي يجمع الـ 25 الف توكيل في بلد تعداد سكانها 104 مليون ؟؟؟؟
.
3- طب هو ينفع حد كان برتبة فريق وكمان كان رئيس أركان القوات المسلحه المصريه بجلالة قدرها ... ميعرفش ابسط مبادىء القانون العسكرى و الاجراءات الصارمه الواجب اتخاذها قبل البدء في مباشرة الحقوق السياسيه ؟؟؟؟
.
طبعا الاجابة على الثلاثة اسئله السابقه هي قولا واحداً ... لأ ..... الله !!!! .... أمال ايه الموضوع ؟؟؟؟
.
شوف يا سيدي و ببساطه كده و في نقط مباشره و محدده ...
.
• الجيش المصري و اللى بيتم تلقيبة في الغرب ب مصطلح "الصخره the Rock" ... شاء من شاء و أبي من أبي هو القلب الصلب للأمه المصريه ... و هو رأس حربة الامه المصريه في التصدي لمخططات الدول العظمي لتفتيت و هدم الجائزه الكبرى و هي مصر ... و هو من أوقف مخططاتهم لهدم المنطقة بالكامل .... و مش بس كده ... ده كمان هو قاطرة التنميه و التطوير و التنميه في مصر ... و اللى بينفذ وبيشرف على مشروعات عملاقه بتكاليف تقل عن الربع عن مثيلاتها في العالم و بمعدلات تنفيذ مرعبة ... و ده عشان يقدر يوقف الدوله المصريه على رجلها و تقدر تواجه مؤامرات منتخب العالم على المنطقة و الدولة المصرية خاصة و اللى كان تدخله حاسم في تنفيذ المشروعات دي بسبب الفشل الذريع في منظومة مصر المدنية بآلياتها المتمثلة في الادارات المحلية و المحافظات و القوانين و البيروقراطية و الفساد و اللى لو اعتمدنا عليها في الوقت الحاسم ده كان زماننا في مكان تاني خاااالص اسواء بكتييييير مما تتخيلوا ... و ده اللى ربط الشعب اكتر بالجيش في الفترة دي.
.
• تكوين الجيش المصري كمنظومة و مؤسسة تقوم على ارتباطها بشعبها و ارتباط الشعب بيها ... فهي حاجه كده ملهاش ملامح ... شعب طالع له جيش .. او جيش طالع له شعب كـ لوغاريتم غير قابل لفك طلاسمه بالنسبة للاشرار .... و ده ليه اسباب كتييييير ... الكثير منها تاريخيا لمواقف الجيش البطوليه في حماية شعبه و ارضه ..... و الاخر يتعلق بالمنظومه نفسها ... فالشاب العادي بيكون مدني من الشعب ... يدخل الجيش يبقي جيش ... يطلع من العسكرية يرجع تاني شعب ... يطلب في استدعاء يرجع تاني جيش ... يخلص استدعاء يرجع تاني شعب .... فالقيم العسكرية مزروعة في ملايين الشعب العادي و اللى في لحظه .... ممكن تلاقي ملايين المدنيين العاديين نسوا مشاكلهم و اتوحدوا و بيقاتلوا في الشارع لحماية بلدهم ... و عم صلاح بتاع حلون احسن مثال على كده.
.
• يعني بكل الاحوال .... محدش يقدر على مصر إلا لو تم تفكيك الجيش ده اللى واقف زي اللقمه في الزور لمخططي تدمير المنطقه .... و بالذات بعد ما شفنا فشل كل محاولات تجنيد ناس من جوه الجيش لعمل انشقاقات داخلية .... او حتي عن طريق الاشاعات ... و كلنا نفتكر اخبارمجموعة ضباط 8 ابريل بتوع التحرير مرورا بانشقاق اللواء أحمد وصفي و انه حبس السيسي و المجلس العسكري و غيرها من الاخبار اللى اخرها انشقاق الفريق محمود حجازي .... و السبب الرئيسي في موت الاشاعات الهبلة دي ... هو ارتباط الشعب بجيشه و ثقته فيه.... و حتي كل محاولات الفيلم الهابط بتاع ادخال ملابس عسكرية و تصوير ممثلين يرتدون الزى العسكري بيقتلوا في الشعب بائت بالفشل الزريع.
.
• طب يبقي الهدف الاول ليهم هو فك الارتباط ده بين الجيش و شعبه ... و الهدف التاني هو هدم المؤسسة العسكرية ذات نفسها .... الهدف الاول ممكن يجي لو قدرنا نقنع الناس بوجود فساد و سرقة و خلافات داخلية بين قادة المؤسسة العسكرية نفسها و ده مش حيحصل إلا بإستنساخ تجربة حصلت قبل كده في مصر في منتصف السبعينات ... و اللى كان بطلها أيضا رئيس اركان ... و اللى سلم نفسه تماما لكل اعداء مصر اللى كانت بتهاجمها في الوقت ده ... و لم يفوت فرصه الا و استثمرها للنيل من قيادات الجيش و التشكيك في نصره و ولاؤه ... سواء بمذكرات او بمقابلات تليفزيونية او باحتفاله في قناة البي بي سي بإغتيال قائد او ببثه اوامر للجيش المصري بالانقلاب العسكري و قتال بعضه عن طريق الاذاعة الليبية طوال ليلة اغتيال السادات و اللى كان الصعيد بيحصل فيه مذبحه ضد قوات الشرطة لاعلان انفصال الصعيد عن مصر.
.
• الهدف التاني يكون بهدم الاساس اللى قائم عليه المؤسسة العسكرية و هو يتلخص في كلمة واحده و هي "الإنضباط " ... و الجزء ده مهم جدا و ياريت تركزوا معنا فيه الله يرضى عليكم .
.
• الناس المدنيين اللى زي حالاتنا مختلفين باختلاف بيئتهم و تعليمهم و مستواهم الاجتماعي .... الفلاح و الصعيدي و السيناوي و القاهري و السواحلي و الغني و الفقير و خريج الهندسه و الطب و الدبلوم و الابتدائيه و خريج الجامعات الخاصه و الجامعات الوطنيه و ال AUC .... كل دول لما بيخشوا الجيش ... بيتحطوا في قالب واحد متقدرش تفرق ما بينهم .... كتله صلبه بيتم إذابة كل الفوارق دي ... بيشتغلوا زي التروس المتماثلة المتناسقة في منظومة عملاقة بنفس الأداء ... الناس كلها بنفس اللبس .. نفس الخطوة العسكرية ... نفس مصطلحات الكلام ... نفس طول الشعر ... حتي نفس طول السوالف و ربطة الحذاء ... الالية اللى بيتم بيها تحقيق ده و اللى هي اساس تكوين الجيش المصري هي مصطلح "الانضباط" ... و اللى الجيش عارف كويس جدا اهميتها و بالتالي لا يتهاون فيها تحت اي حال من الاحوال في تطبيق القانون الصارم اللى بينفذ على القائد قبل اقل رتبة في الجيش... لان ببساطة ... اي تهاون فيها او استثناء ... هي بداية انهيار المنظومة العسكرية المصرية و بداية تفكك الكتلة الصلبه اللى محدش عارف يفكها لغاية دلوقتي.
.
• طيب لما يجي قائد كبير ... و هي يعرف كل الكلام ده ... و هو حافظ عن ظهر قلب القوانين العسكريه ... و يضرب بكل ده عرض الحائط ... و في التوقيت ده ... يبقي ايه السبب ؟؟؟ .... يبقي لو انا اللى بخطط لهدم الجيش ده ... مش حلاقي افضل من هذا التوقيت من اني اضرب ضربتي اللى حاولت اضربها في الانتخابات السابقة و لسبب ما عرفت اني حفشل ... فأجلتها ككارت معايا للانتخابات الحالية .. و بالذات اني نجحت اني اقنع الناس اني الانتخابات لازم يكون فيها متنافسين كتير و ان الدوله حتكون مزنوقة في مرشح ليه وزنه قدام الناس لصفته العسكرية السابقة و حتكون في حرج بالغ انها تاخد اجراءاتها المعتادة في حالة خرق القانون العسكري ... و بكدة ... تكون سابقة خطيرة في خرق الانضباط العسكري ... و اللى حيتم استخدامها و البناء عليها لاحقا .. و بالذات ان في الغرف المغلقة كان فيه ضغط كبير على الدولة المصرية من الخارج لدعم هذه التجربة ... و احنا بنتوقع " توقع يحتمل الخطأ و ليس معلومه

" ... ان اسم القائد ده جه على لسان الحاج بنس نائب الرئيس الاميريكى في زيارته الخاطفه لمصر.
.
• طيب و بما ان فرصته في النجاح في الانتخابات تكاد تكون شبه معدومة لاتفاف الشعب حول جيشه و قيادته الحالية ... فكنا حنشوف الهدف الرئيسي من التجربه دي ... و اننا كنا حنشوف مهاترات و تصريحات و مذكرات و اكاذيب عن فساد الجيش و خيانة قاداته للشعب و الوطن و اللى كانوا مجهزين برامج و صحف اجنبية بالصحفيين بتوعها لنشر الاكاذيب دي لتشكيك الشعب في جيشه و قياداته و تأليب الناس على الدوله المصريه ... و الاهم ... على جيشها ... و يمكن ينولوا المراد بتحقيق احلامهم و توصل الامور الى خلافات داخل الجيش ذات نفسه ...
.
• كلام الرئيس كان واضح و حاسم الفترة الماضية ... ان القرار المصري ... مصري خالص و لا تأثير لاي قوي خارجيه على قراراتنا .... يعني اضربوا دماغكم في الحيط
.
• المؤسسة العسكرية حمت نفسها بقرار تاريخي و ان كان اعتيادي في مثل هذه الظروف ... و قطع السكة على الجميع .... الاخوان اللى كانوا متغطيين بالدعم الامريكي و كانوا حاطين في بطنهم بطيخة صيفي ان الدولة المصرية حتتزنق و لن تتجرأ على تنفيذ القانون على هذا الشخص ... و في نفس الوقت ... كانوا بيحضروا نفسهم للمرحلة الثانية من الاكاذيب اللى كانوا حيروجوها و يعيشوا عليها لسنين قدام زي ما عملوا بعد انتصار اكتوبر.
.
• و ده اللى جننهم خلاهم يهددوا باغتيال الرئيس علانيةً .... فى الفترة القادمة ... حيحاولوا يثبتوا و يرسخوا مصطلح ... توطن الارهاب في مصر بكل ما أوتوا من قوه ... بس مصر و شعبها مستعد .... و العمليات اللى بيتم احباطها محدش يتخيلها.
.
• و يجي هنا السؤال المهم ... هو مين اللى قال ان الانتخابات لازم يكون فيها مرشحين حتي و ان كان المعارضين فيها كومبارس مش عرفين يلموا 25 الف توكيل لبلد تعداد سكانها 104 مليون ؟؟؟
مين اللى قال ان حتي لو انسحب كل المرشحين من امام الرئيس ... تكون الانتخابات مطعون في شرعيتها ؟؟؟؟؟
.
• الله يرضي عليكم ... بلاش تتخطفوا زهنيا تاني .... هو احنا مش بنتعلم ؟؟؟؟ ..... الانتخابات يا ساده شرعيتها بتيجي من عدد الناس اللى بتروح تصوت ... حتي لو لمرشح واحد فقط ... زي الاستفتاء .... فالدستور المصرى بيقول الاقتراع يجب أن يتم حتى لو تقدم للترشح شخص وحيد أو تنازل له الآخرون، ولنجاحه يشترط حصوله على 5% من قاعدة الناخبين، وفي حال عدم حصوله على هذه النسبة تعلن الهيئة فتح باب الترشح لانتخابات جديدة خلال 15 يومًا.
.
• يعني لو نزل الانتخابات 2 و نص مليون مصري قالوا نعم .... محدش يقدر يفتح بقه و يقول تلت التلاتة كام ... فياريت مانشغلش بالنا مين انسحب و مين حيقدم .... الكل حيشارك و ينزل يصوت بكثافه تتعدي الاصوات اللى نزلت في الانتخابات الاولي . فالتصويت بكثافة هو اللى يجدد الشرعية الرئاسية من تانى يعنى أمام العالم كله لازم اللى ينزلوا فى الإستحقاق الإنتخابى يكونوا أكثر من المرة الأولى
و ده دور كل واحد فينا
.
• اما اللى بيحاولوا يقنعونا انهم معارضة و ليهم شعبية ... في الواقع هم اسوأ مثال على النخبة المدنية الفاشلة اللى هم بينهم و بين نفسهم مقتنعين تماما بالشعبية الجارفة لقائد الدولة المصرية الحالي .... و لكن ينقسمون لقسمين .... البعض بيصر على الوجود و الاستثمار في شعارات الزولم و الكهر و الكمع ليس للمعارضه و لكن لاستمرار السبوبة اللى اتغني منها عشرات ممن يسمون انفسهم بالنوووشتااااء و الحكوكيين ليعلوا من سعرهم بالنسبة للمولين الخارجيين ... و البعض الاخر تحالف مع الشيطان لهدم هذا الوطن لكرهه الشديد لوطنه و شعبه .... فتحولوا لابناء غير شرعيين للشيطان
.
• و زي ما الرئيس قال .... مصر أمانة في اديك ... انزل و انتخب .... انشالله تقول مش موافق ... بس لازم تنزل.
.
و اخيرا ... كلمة قالها الرئيس زمان .... الجيش نار ... لا يتلعب بيه ... و لا يتلعب معاه
.
تحياتنا
.
.
الموقع الارشيفي للصفحة
http://www.kalamfelsamim.com/
.
#تحيا_مصر
#لن_ينطفىء_نور_مصر
#تحيا_مصر_ماحدش_تانى
#الشعب_يدعم_الرئيس
#مصر_أم_الدنيا_وهتبقى_قد_الدنيا
#مصر_قلب_النظام_العالمى_الجديد
#كلام_في_الصميم
صفحة #كلام_فى_الصميم

https://www.facebook.com/kalamfelsamim/ ... 7135450704

المهاجرة · **مرسل:** الأربعاء يناير 24, 2018 11:15 pm

اللم احفظ مصر واحفظ جيشها ووفقه وكل مؤسسات البلد

اللهم احفظ الرئيس السيسى وانصره ووفقه واعنه وأيده يارب بمددك

يانور سيدنا النبى · **مرسل:** الأربعاء يناير 24, 2018 11:22 pm

المهاجرة كتب:

اللم احفظ مصر واحفظ جيشها ووفقه وكل مؤسسات البلد

اللهم احفظ الرئيس السيسى وانصره ووفقه واعنه وأيده يارب بمددك

اللهم آمين آمين آمين

موقع د. محمود صبيح

كلام فى الانتخابات

الموجودون الآن