موقع د. محمود صبيح

كلام مهم عن توجه جديد لإعادة الحشد نقلته عن أحد الشباب المبتلى بفيروسات الثورة تداوله الكثير من شباب 6ابليس والاخوان احب مشاركتكم به


(
عن " الكوميونيتى " !

فى السنين اللى فاتت كان اتكون فى مصر "كوميونيتى" من الشباب والبنات لهم خلفية ثقافية واجتماعية متقاربة جدا ..
ولما قعدت افكر فى كمية الحاجات المشتركة اللى ما بينهم استغربت من تجمع الحاجات دى مع بعض فى العدد الكبير ده ..
جاوب على الاسئلة دى علشان تعرف انت من "الكوميونيتى " ولا لأ !

- حضرت درس لعمرو خالد فى مسجد الحصرى قبل كده ؟ (لو انت فوق الثلاثين)
- حضرت درس لمصطفى حسنى فى يوسف الصحابى او المقطم قبل كده ؟
- وزعت بنفسك شنطة رمضان قبل كده او عبيتها بايدك ؟
- اشتغلت فى جمعية خيرية بتعمل انشطة متنوعة زى صناع الحياة او رسالة او بنك الطعام ؟
- بتسمع حمزة نمرة ؟
- رحت لحمزة حفلة فى الازهر بارك او الجامعة الامريكية ؟
- عندك او كان عندك تى شيرت ل NAS؟
- بتروح مكتبة ألف أو ديوان ؟
- كنت مشترك فى صفحة كلنا خالد سعيد قبل 25 يناير ؟
- نزلت 25 يناير او كنت متابعها لحظة بلحظة على النت ؟
- نزلت 28 يناير ؟
- اتعودت على قنابل الغاز وبقيت خبير فى التعامل معها ؟
- كنت مؤيد للثورة من اول يوم لها ؟
- انتخبت ابو الفتوح او العوا أو مرسى فى الجولة الاولى ؟
- انتخبت مرسى فى الجولة الثانية ؟
- بتسمع ماهر زين ؟
- كنت بتسمع سامى يوسف ؟
- شغلت بارك الله لكما أو أجمل فرحة بتاعت ماهر زين فى فرحك ؟
- كنت بتتفرج على برنامج صناع الحياة ؟
- ما كنتش بتفوت حلقة من برنامج خواطر بتاع الشقيرى الا لما تعملها شير ؟
- كنت بتروح زدنى أو بيان أو بداية أو انوار رسالة ؟
- حضرت ادارة الوقت مع د/محمد عمر ومهارات المقابلة الشخصية مع د/عمرو الفص ؟
- كنت بتحضر محاضرات تنمية بشرية عمال على بطال ؟
- حضرت محاضرات القيادة والتخطيط اربع خمس مرات على الاقل ؟
- هتفت مرة واثنين وعشرة " يسقط حكم العسكر " ؟
- قرايبك من مؤيدى السيسى بيقولوا عليك اخوان حتى لو انت مش كده ؟
- بتدعى على الظالمين ؟
- صليت وراء د/خالد ابو شادى ؟
- ما حسيتش بحلاوة رمضان السنة دى مقارنة بسنين قبل كده ؟
- نزلت رابعة ؟
- مشيت فى مظاهرات بعد 3 يوليو ؟
- مش طايق البلد ونفسك تخلع أو خلعت already ؟
- تعرف واحد أو أكثر ماتوا السنتين اللى فاتوا وهم تحت الخمسة وثلاثين ؟
- تعرف واحد أو أكثر اعتقلوا السنتين اللى فاتوا أو لسه معتقلين ؟
- سمعت سلسلة فتح الاندلس او السيرة النبوية ل د/راغب السرجانى ؟
- كان عندك طاقة ايجابية رهيبة بعد 11 فبراير وكنت حاسس انه البلد دى هتتقدم بسرعة رهيبة واننا نقدر نصلحها ؟
- دلوقتى شايف انه البلد داخلة على ايام سووووودة وانه حالها مش هيتعدل قريب ؟

لو معظم الاسئلة اللى فاتت اجابتك عليها كانت ايوة فده معناه انك واحد من "الكوميونيتى" !
واحد من الشباب اللى بيحب دينه .. بيعمل خير .. بينمى بلده .. بيطور من نفسه .. ايجابى وعايز يبقى مفيد .. مهتم بحال بلده ونفسه انها تبقى احسن ..
ومش طايق يشوفها وهى بتتهد قدامه وهو مش قادر يعمل لها حاجة !!
الشباب والبنات اللى فى "الكوميونيتى " ده لو كانت اتيحت لهم الفرصة انهم يشتغلوا تحت رؤية واضحة لتنمية البلد والنهوض بها كانوا هيبقوا القاطرة اللى تشد البلد كلها لقدام !
شباب وبنات الكوميونيتى ده بنسبة كبيرة فقدوا فرصتهم انهم يلاقوا حد يجمعهم علشان يشتغلوا مع بعض ..
بس دورنا دلوقتى اننا نشتغل علشان نخلق "كوميونيتى" جديد من الشباب والبنات الصغيرين .. لازم يلاقوا فينا القدوة علشان نغرس فيهم المعانى اللى اتربينا عليها ..
هم هيقدروا يعملوا "الكوميونيتى" بتاعهم اللى هيكون أقوى وأوعى وأشرس من الكوميونيتى بتاعنا نتيجة الظروف اللى هم عايشين فيها دلوقتى !
فرصتنا اننا نصلح بلدنا بايدينا بقت ضعيفة ..
بس دورنا لسه ما خلصش ..
دورنا اخد شكل مختلف شوية ..
بدل ما هنكون الايد اللى بتبنى ..
هنكون العقل اللى بيأسس ويفكر ويربى ويوعى ..
ده دورنا اللى ماحدش هيعمله غيرنا ..
ايوة اليأس خيانة ..
حتى لو مش هنشوف النصر بعنينا ..
فعلى الاقل الاجيال اللى بعدنا تدعى لنا بدل ما تدعى علينا ..
ونلاقى حاجة نقولها ربنا لما يسألنا عن عمرنا وعن شبابنا !
عمرنا لسه ما خلصش ..
لو فاضل لنا فيه ساعة واحدة ..
خلينا نغرس فيه الفسيلة ..
اللى غيرنا هيرويها ويكبرها ويقطف ثمارها !
خلوا أعمارنا صدقة جارية ثوابها يوصل لنا بعد مماتنا !
خلونا نحط بذرة ل "كوميونيتى " جديد ..
كله وعى وكرامة وأمل وعزة ..
ومين عارف ..
يمكن ربنا يمد فى أعمارنا ونشوف ثمرة اللى احنا زرعناه ..
الله غالب !)


انتهى النقل


https://www.facebook.com/ahmad.gheita/p ... 3120300329