مقال مهم ومكتوب بعناية انقله بتمامه للاهمية



الحرب النفسية وتمهيد الطريق إلى 25 يناير ..!!
-----------------------------------------------------

شوفوا بقى ..

بما إن الموضوع من النهاردة هــ يبقى دسم شوية ومليان معلومات كتير ومقارنات ، فــ أستأذنكم فى كوباية الشاى اللى انتم متعودين عليها وإنتم بتقرأوا سلسلة المقالات اللى من النوعية دى .. لأن بالرغم من إن المصطلح اللى هــ نتكلم عنه النهاردة معظمنا يعرفه وسمع عنه ويمكن قرأ عنه كمان ، إلا إن قليّلين قوي اللى عارفين معناه ...

معناه الحقيقى ... !!!

الفكرة الأولى اللى بــ تيجى فى ذهن أى شخص بمجرد ذكر كلمة "الحرب" فى عصرنا الحديث ، هو مدافع وقنابل ودبابات وطيارات .. واللى بيترتب عليها قصف ودمار وإنفجارات ، ودماء .. وألم ومرارة بلا حدود ..

ومن كتر ما الصورة دى مترسّخة فى وجداننا ، بــ ننسى إن الصورة دى هى الصورة المادية للحرب ، لكنها مش كل الحرب ، .. لأن وراء الصورة دى وخصوصاً فى الحروب الحديثة ، بــ تكون فى الخلفية دايما حرب أشرس وأعنف ، و اللى الخبراء بــ يعتبروها هى أساس الحرب الشاملة .. ونقصد هنا طبعاً مصطلح "الحرب النفسية" .. أو "الحرب المعنوية" واللى هى الدعامة الرئيسية لحروب الجيل الرابع

الحرب النفسية من أخطر أنواع الحروب .. وأقساها على الاطلاق .. و مدى خطورة الحرب النفسية هو إنها بــ تستهدف قلب الإنسان وعقله وبــ تعمل على تغيير سلوكه لغاية لما تسحبه واحدة واحدة للهزيمة والاستسلام ، .. لأن اللى بتعمله الحرب النفسية هو إنها بتشتغل على الروح المعنوية وزعزعة الإيمان بالشئ اللى انت مؤمن به ، بالإضافة للتشكيك في القيادات المسؤولة عنك سواء سياسياً أو عسكرياً فــ تزعزع الثقة و تزرع اليأس وروح الاستسلام في النفوس، واللى بيترتب عليه فى النهاية إضعاف الجبهة الداخلية وخلق ثغرات فيها .. والباقى بعد كدة يبقى مافيش أسهل منه

وعلشان نبسّط الموضوع ونقرّب الصورة للأذهان .. هــ ندّى لمحة تاريخية عن الحرب النفسية ، .. لأن اللى قرأ كتير فى التاريخ هــ يلاقى إن من أشد الأمثلة الصارخة تاريخياً هى حروب التتار ، .. لأنهم كانوا بــ يبعتوا مندوبين لهم فى البلدان اللى عايزين يحتلوها ، قبل موعد الإحتلال بعدة شهور ، والمندوبين دوول بــ يكونوا بــ يتكلموا لغة البلدان دى ، ويبدأوا ينتشروا فى الأسواق والحدائق والحانات ويندسوا بين الناس فى كل مراكز التجمعات السكانية ، ويفضلوا بأسلوب مكثف يتكلموا عن التتار وقوتهم وقسوتهم وجبروتهم ، ووحشيتهم ، وجيوشهم اللى مالهاش أخر بالرغم من إن الثابت تاريخياً ، إن جيوش التتار ماكانتش أعدادها كبيرة .. والناس كانت طبعا تصدق وتقتنع وتترعب ، .. وبعدين يبتدوا يتناقلوا الكلام ده بينهم ، والكلام يوصل لقيادات الدولة والجنود والجيش ... ولما تحصل المواجهة المباشرة تكون الهزيمة الساحقة ، لأن نصف المعركة خلصت أصلاً قبل ما الجيوش تتقابل !! ... وهو ده نفس الأسلوب اللى إستخدمته الجهات اللى عملت "داعش" ، لكن بإستخدام الوسائل الحديثة طبعاً ..

ولأن الزمن بــ يتغير ، والأساليب بتتطور ، أصبحت الحرب المعنوية بتشتغل من خلال الفيسبوك وتويتر وكل وسائل التواصل الإجتماعى .. ده غير المواقع المختلفة زى المواقع الصحفية ، والمدونات العامة ، واليوتيوب ومواقع الصحف والقنوات الإخبارية المتخصصة .. وده اللى هــ نتكلم عنه فى المقال القادم عن الحرب النفسية بإستخدام الدعاية السلبية ....

وطبعا أسهل حاجة هى الإشاعات والتسريبات المتفبركة ، علشان يتم تشكيك الناس فى كل اللى حواليهم ، زى بالضبط التسريبات المتفبركة اللى ظهرت مؤخراً ، ولسة كمان هــ تظهر حاجات تانية ، واللى برغم تفاهتها إلّا إن الهدف من وراءها إنه يحصل إهتزاز فى الأرضية الثابتة اللى الجميع واقف عليها ، لأن الهدف الرئيسى زى ما قلنا هو تحطيم حالة التلاحم المجتمعى مع قيادات الدولة السياسية والعسكرية.

الحلفاء حسموا معركتم فى الحرب العالمية الثانية ضد ألمانيا بإعلان إنتحار هتلر وإستسلام كل قيادات النازى رغم إن ده ماكانش لسة حصل فى وقتها ، إلا إن الخبر أثر على الروح المعنوية مش للجيش بس ولكن للشعب الألمانى كله ، .. و زى بالضبط ماحصل فى العراق لما أعلنت قناة الجزيرة سقوط مطار ومدينة بغداد قبل ماتسقط فعلياً بأسبوع .. وزى ماحصل فى 2011 فى مصر لما طارت إشاعة بهروب كل قيادات الوطنى المنحل والدنيا ساعتها إتقلبت على المجلس العسكرى ، وظهر بعد كدة إن ده كان إشاعة !!! .. ده غير احداث تانية كتير كانت بتحصل بشكل مدروس ومنظم ، خلّت فى النهاية ناس كتيرة تهتف بدون وعى "يسقط حكم العسكر" ..

ولو رجعتوا لأخر 5 سنين من حكم مبارك هــ تلاقوا إن الإخوان ، والغرب ، والأهم منهم طبعاً وسائل الإعلام اللى كانت بــ تشتغل على حاجات بتحصل فعلياً ، فــ تاخدها وتكبّرها وتضخمّها وتخلط معلومة صحيحة بــ 100 معلومة غلط .. زى مثلا قصة تصدير الغاز لإسرائيل واللى طلعت كلها كلام ناس معاتيه مش فاهمين حاجة .. لكن إشتغلوا عليها كويس قوى ، (و إفكركم بــ فيلم صرخة نملة فى قصة الغاز دى) ، وكل ده علشان تزيد حالة الإحتقان ، و يبتدى التلاحم المجتمعى يتفكك مابين مؤيد ومعارض ، وتوسع المسافة مابين القيادة والشعب ، ويكون هو ده المدخل اللى بــ يتم الدخول منه ... (وطبعا مش معنى كلامى إن نظام مبارك ماكانش نظام فاسد وظالم) ..

إحداث البلبلة ، والتكسير فى الثوابت ، ومحاولة تدمير الثقة بين الشعب وقيادته هو أول الطريق لهزيمة سريعة للشعوب ، وإنتصار مريح وسهل للعدو ، لأنه بيهاجم الروح المعنوية وبــ يسمح للسوس إنه ينخر فى المجتمع ويخلّى الفتن تنهشه ، لغاية ما يتأكل من جواه ، والباقى بعدها بــ يبقى سهل جدا !!

المقال اللى جاى زى ما قلت ، هــ يكون عن الحرب النفسية بإستخدام الدعاية السلبية ، و المقال ده هــ يكون هو مفتاح اللغز كله ، لأن هو ده بالضبط وبالحرف اللى بــ يتم تنفيذه فى مصر دلوقتى بمنتهى الحرفية .. وهــ يفضل شغّال فى الــ 3 أو الــ 4 شهور اللى جايين مروراً بــ 25 يناير وبعدين إنتخابات البرلمان و وصولاً لشهر مارس القادم ..

مش محتاج أتكلم تانى و أؤكد على ترابط الجبهة الداخلية ولفظ كل محاولات التشكيك وإثارة البلبلة ، لأن زى ما نوهنا من يومين إن المرحلة دى ماينفعش فيها رفاهية ثقافة الإختلاف أبداً.

برجاء عمل شير بــ لينك المقال على أوسع نطاق لأن ده هــ يبقى جزء من عملية توضيح الصورة وتنوير العقول

وللحديث بقية .. وعلى أكبر قدر من الأهمية
https://www.facebook.com/kalamfelsamim/ ... 47/?type=1

الشائعات وتمهيد الطريق إلى 25 يناير ..!!
----------------------------------------------

أصدقاؤنا أصدقاء صفحة كلام فى الصميم .. معادنا النهاردة مع أخر جزء فى موضوع الحرب النفسية ، ..
ومن بين كل أنواع الحرب النفسية اللى ذكرها التاريخ ، وإتكلمت عنها إستراتيجيات الحروب ، وفنون الجاسوسية وإختراق الجبهات الداخلية ، هنلاقى إن الشائعات هى أهم وأخطر جزء فى الحرب الشاملة وحروب الجيل الرابع !!

والشائعات بتختلف عن كل وسائل الحرب النفسية الأخرى ، لأن خطورتها بــ تكمن فى إنها بــ تنطلق من مصدر مش ممكن تحديده أو حتى تتبعه ، لأن الشائعة ممكن يكون بدايتها من إثنين بــ يتكلموا على القهوة ، أو فى مصنع ، أو شركة ، أو حتى مدرسة أو جامعة !!

وطبعاً بسبب التطور التكنولوجى والطفرة اللى حصلت فى وسائل الإتصالات أصبح إطلاق الشائعات من أسهل ما يكون ، وأصبح نشرها فى دولة تبعد ألاف الكيلومترات عن مكان إطلاق الشائعة ، بــ يتم بتكة زرار واحدة ، عن طريق مئات بل الألاف من المواقع الأليكترونية الصحفية ومواقع التواصل الإجتماعى ومواقع الملفات المسموعة والمرئية

وقوة الشائعة ومدى تأثيرها بيعتمد على حاجات كتير منها توقيت نشرها ، وإرتباطها ، بحدث مهم ، ومقدار الثقافة المجتمعية ، ومدى تقبل المجتمع للشائعة دى .. وعلشان كدة تم تصنيف الشائعات إلى أنواع كتيرة جدا ، تكتيكية وإستراتيجية منها 3 أنواع رئيسية هى اللى هــ نتكلم عنها النهاردة ..

أول نوع بــ يطلق عليه إسم "الشائعة المتفجرة" .. ودى بــ يكون تاثيرها عنيف جداً فى المجتمع ، وبــ تنتشر بقوة وبسرعة شديدة ، لأنها بتكون متعلقة بحالة مجتمعية متوترة للغاية ، و بــ يكون الغرض منها إحداث أعلى درجة من البلبلة .. زى بالضبط ماحصل بعد الحكم ببراءة مبارك ، لما إنتشرت إشاعة قوية جداً غير معروفة المصدر إن جمال مبارك هــ يرشح نفسه للرئاسة فى 2018 .. وزى إشاعة إنشقاق الجيش فى سنة 2013 بقيادة اللواء أحمد وصفى قائد الجيش التانى الميدانى .. وشائعة هروب قيادات الدولة فى الأيام الاولى لثورة يناير 2011 ، واللى عملت إضطراب كبير فى صفوف قيادات الشرطة ..

أحلى حاجة إن فيه شائعة من النوع دة إنطلقت قبل فعاليات 28 نوفمبر اللى فات ، لما إتقال إن الرئيس السيسى هرب من مصر على فرنسا علشان كان هــ يتم القبض عليه بعد نجاح الثورة الإسلامية المسلحة ، لكن وعى الشعب المصرى خلّى الشائعة دى فسسسسسسس ..

النوع الثانى .. إسمه "الشائعة الزاحفة" .. ودى بــ يبقى تأثيرها إستراتيجى طويل المدى، و بــ تعتمد على الانتشار، والتوغّل فى المجتمع واحدة واحدة، بحيث إن كل الناس تتكلم فيها ، وتضيف إليها، من غير ما يأخدوا بالهم ، فتزحف الشائعة فى المجتمع لغاية لما تصبح بالنسبة له غير قابلة للجدل ، ويصبح تكذيبها أشبه بالكذب، مش بكشف الحقيقة، .. وعلشان كدة فــ الشائعة الزاحفة تعتبر من أخطر أنواع الشائعات، لأنها بتقدر تغير تفكير مجتمع كامل، مع مرور الوقت .. وأشهر شائعة من النوع ده هى شائعة "الجيش الإسرائيلى الذى لايقهر" واللى تم ترسيخها فى المجتمعات العربية والمجتمع المصرى ، لدرجة إنك تلاقى لغاية دلوقتى ورغم إنتصار الجيش المصرى فى حرب 73 بمعجزة عسكرية بكافة المقاييس و على كل المستويات ، إلّا إنه فيه ناس مؤمنة لغاية دلوقتى إن إسرائيل قادرة على هزيمة مصر فى أى مواجهة عسكرية وإنهم يقدروا يوقّفوا عمل الأسلحة المصرية بتكة زرار

النوع الثالث .. هو "الشائعة الغائصة" .. ودى شائعة من نوع خاص، لأنها بــ تظهر فى ظروف معينة ، وبعدين تغوص فى المجتمع ، وترجع تظهر مرة ثانية ، كلما تكررت الظروف نفسها ، والنوع ده من الشائعات، بيعتمد على تكرار ظروف معينة، فى مجتمع معين ... زى بالضبط شائعة إن الحكومة ضيّعت فلوس المعاشات ، أو شائعة القانون اللى بــ يتيح للحكومة الإستيلاء على مدخرات المصريين فى البنوك .. وتلاقى دايماً الشائعات دى تشتغل بمجرد ما يبقى فيه أى أزمة لها علاقة بالعملة أو بالصعوبات اللإقتصادية اللى بتواجه الدولة

ومن الشائعات المشهورة واللى إنتشرت وأحدثت دوى شديد فى مصر فى السنوات الأخيرة:

- إغتيال الرئيس السيسى حوالى 5 مرات.
- إن الرئيس السابق عدلى منصور مسيحى.
- هروب الرئيس السيسى إلى فرنسا قبل 28 نوفمبر الماضى.
- ترشح جمال مبارك للرئاسة فى 2018.
- وفاة مبارك بتاع 50 مرة كدة ..
- الــ 70 مليار بتوع ثروة مبارك واللى كانوا هــ يسددوا ديون مصر والباقى هــ يتوزع على الشعب المصرى.
- فساد قيادات الجيش وخيانتهم أو عمالتهم لإسرائيل.
- إن إنسحاب الشرطة من الشوارع فى 2011 علشان البلطجية تخرج على الناس ويهاجموا الثوار ، فيتم إجهاض الثورة.
- حلف الناتو والأسطول السادس هيضربوا مصر علشان خاطر يرجّعوا حكم الإخوان.
- مرسى راجع
- داعش هــ تدخل مصر.
- وغيرها كتير مما لا يحضرنى ذكره لكن كل ما بــ أفتكر حاجة بــ أفضل أضحك وأقول إزاى بس كنا بنصدّق الكلام ده !!

وممكن كل واحد ياخد واحدة من الإشاعات دى ويبتدى يجرب كدة ويشوف دى ينطبق عليها أى نوع (زاحفة - متفجرة - غائصة - تكتيكية - إستراتيجية)

إحنا وضّحنا أمثلة للإشعاعات وأنواعها .. ولازم نفهم إن الشائعات مدمرة للمجتمع ، وفى الظروف اللى إحنا فيها دى ، بتبقى أخطر سلاح بيتم إستخدامه للتكسير فى المجتمع ، لأن اللى بيجرى وراء الشائعات بــ يفقد أهم خاصيتين ممكن أى حد يتمتع بهم ، همّ خاصية العقل ، وخاصية التوثيق من المعلومة ..

وحتى القرأن الكريم وصف عملية تناول الشائعات بقول الله عز وجل "إذْ تَلَقَّوْنَهُ بِأَلْسِنَتِكُمْ وَتَقُولُونَ بِأَفْوَاهِكُم مَّا لَيْسَ لَكُم بِهِ عِلْمٌ" ... صدق الله العظيم ... والوصف القرأنى هنا دقيق جداً لأنه قال "إذْ تَلَقَّوْنَهُ بِأَلْسِنَتِكُمْ" مش بأذانكم .. يعنى بتسمع الإشاعة لكنها بتنزل على لسانك وتنقلها بسرعة قبل ما تعدى على عقلك أو تحاول تتأكد منها ومن مصدرها ..

طب نعمل إييه ، وخصوصاً فى الفترة القادمة اللى هــ تكثر فيها الشائعات جداً جداً بدرجة غير مسبوقة لأنهم بيسابقوا الزمن لإسقاط مصر أو تعطيلها قبل الوصول إلى نقطة اللاعودة !!؟؟؟

- ما حدش يشيّر أى خبر بدون التأكد من مصدره.
- مراعاة المنطقية في التعامل مع الأخبار.
- عدم التعامل بل ومهاجمة المواقع والصفحات اللى بتنشر أخبار من النوعيات المجهلة المصدر.
- أى حد تلاقيه بــ يقول "خبر من مصدر سيادى ، أو "خبر من المطبخ السياسى" ، أو "خبر من مصدر موثوق منه" .. تعرف على طول إنه خبر من مطبخ بيتهم
- الثقة فى البلاغات الرسمية حتى لو كانت ضد قناعاتك الشخصية ، لأن أكثر حاجة بتساعد على إنتشار الشائعات هو الشك فى البيانات الرسمية
- الثقة فى القيادة السياسية والإلتفاف الكامل حولها ، لأن فى وقت الحروب بتكون الإشاعات هدفها هو كسر التلاحم الشعبى
- الثقافة الشخصية والعقول الواعية بــ يكون من الصعب نشر الشائعات فيها ، على عكس العقول الفارغة وضحلة الثقافة ، اللى بتبقى عندها القابلية للتفاعل مع الإشاعات بكل سهولة لأنها ..... فاضية

وفى النهاية .. عايز أؤكد على ضراوة الحرب النفسية الحالية ضد مصر والشعب المصرى ، لكننا بــ نراهن فعلياً على وعى المصريين ، ..

الشعب اللى خرج منه خير أجناد الأرض


https://www.facebook.com/kalamfelsamim/ ... 79/?type=1

بسم الله الرحمن الرحيم
احي الفاضل المصرى على هذا الموضوع وطرحه بس لو لاحظنا شئ مع تقديرى للانواع دى

اخطر انواع ما كان له بعض الحقيقة اصلا وهو يتم عبر قص ولزق وازالة التفاصيل وهو اللى بيخلق البيئة الخصبة للغضب
وعدم الانتماء والشعور بالمظلومية اشبه بالفيرس يعمل فى صمت حتى يتمكن من الجسد

مثلا خبر عن حسين سالم راجع وبيتكلم فى تصالح فى كام مليار وجنبه خبر بنت جامعية بتحاول تفتح فى الشارع
مايشبه الكافية وصورة لنضافة المكان وتعليق على جمال الطعم ثم تحطيم الصورة بان الحى والمحافظة والمرافق
وضابط القسم والامين والبلد كلها ضدد البنت المكافحة اللى ما اتكسفتش من العمل فى الشارع
وتعليقات من ناس متضايقه فعلا لا احنا عارفين القصتين دول اصلهم ايه ولا فيه شرح ولا ليه البلد كلها ماسكة فى البنت دى بالذات بس الحكاية ليها اصلا فعلا

قصة تانى ودى برضه شاب واخد ماجستر شغال على عربية فاكهة فى اسكندرية وجنبه خبر عز اللى اتخفضت غرامته عن قضية الاحتكار للعشر

وكما تحبيشة كده مع عقول مش بتحلل ولا تدور اساسا ثم تعليقات سواد فى سواد

الاطفال بتوع الخمس سنين سجن فى الاحداث عشان سرقوا عيش انتشرت اليومين اللى فاتوا مع ان الخبر قديم واصلا كانوا معاهم اكل يعنى معاهم فلوس بس سرقوا تجرمه حسب ما لقيت بعد البحث ونشرت باسم الواد المسيحى بس كمان عشان تبقى منها افترا على الغلبان ومنها بذر فى ارض الشقاق الوطنى


وعلى الناحية التانية خلق صورة عن العدالة المثالية فى بلاد الغرب الغير العلمانى

طيب طول الوقت بتتطبخ صورة ذهنية مدعمة باصل محرف لكن له فعلا اصل مع ناس مش بتدور ولا بتحلل
وتتشرب المظلومية او بمعنى ادق بتملى فى كاس صبرها لحد كبير باكاذيب
سعتها بيبقى فاضل حبة وينكب الصبر منها وده الخطر الحقيقى
واللى مشكلته جاية من التعليم والاعلام المفرغ من المعرفة وادواتها مجرد حفظ وتلقين واصبح هذا اخطر اسلحتهم ضددنا الولاد بقت بتحفظ وتتلقن الكره والسواد من الفيس والنت عموما زى ما اتعودت عليه فى الدروس الخصوصية
لا مناقشة ولا تحليل ولابحث عن اصل لاى شئ والتكرار و تعدد الاساليب بتتحول الفكرة المجردة لمعتقد فكرى لديه
لا يستبدل بسهولة
حفظ الله الوطن

بمناسبة قرب 25يناير نجانا الله منها
يرفع للفائدة