|
-هدير.. اعملي شاي مظبوط لبابا.. و سحلب لماما.. و انا عايز قرفة باللبن
*حاضر يا حبيبي.. حاجة تانية؟
-أيوة.. حطي الحاجات على النار و تعالي لبسيني الشراب عشان سقعان..
بابا، سقعان أخلي هدير تجيبلك شراب بالمرة؟
الأب: لأ يا حبيبي شكراً.. بس ماشاءالله مراتك بتسمع كلامك.. و بتلبسك الشرابات كمان؟
-الله!، طبعاً يا بابا.. و بتجيبلي الأبريق أغسل إيدي بعد الأكل كمان لو مكسل أقوم..
الأم: أيوة كده يا مصطفى يا بني.. بنات اليومين دول مدلعين.. الواحدة من دول تفتح الأبصر إيه ده النت و تسيب جوزها و البيت يضرب يقلب.. لازم تشكمها و توريها إنك راجل
الأب: بس خد بالك يا مصطفى دول مالهمش أمان.. ممكن تنكد عيشة اللي خلفوك
الأم: قصدك إيه يا فوزي؟؟ اتمسى و قول يا مسا!
الأب: يا مسا..!
** هدير جابت المشروبات**
-إيه ده يا هدير؟؟ انتي حاطة كام معلقة سكر في القرفة دي؟!
*معلقتين يا حبيبي
-أنا بشرب معلقتين و ربع.. انتي بتستهبلي يا هدير؟؟ ألبسك القرفة ف خلقتك دلوقتي؟ امشي انجزي اعمليلي واحدة تانية!
*أ .. أ.. أنا آسفة يا حبيبي و الله نسيت.. عيني حاضر.. دقايق و تكون عندك واحدة تانية
الأم: جدع يا مصطفى.. راجل و تربية أمك يا واد
الأب: يا شيخة حرام عليكي.. حرام عليك يا مصطفى كسرت بخاطر مراتك.. قوم صالحها بقى
الأم: بس يا فوزي و اتلم.. سيب الواد يربيها
-ما تقلقش يا بابا هي متعودة على كده.. تحمد ربنا إني استخدمت لساني بس
الأم: هما البنات يتعدلوا غير بكدة؟ الست إذا ماكانش جوزها يوريها مين راجل البيت هتتمرع !
الأب: انتي شايفة كده يا مفيده؟
الأم: و الله شكلك مش هتجيبها لبر يا فوزي!... مش شربت الشاي؟ قوم بينا نروح..
الأب: يا ولية احنا كملنا ساعة؟ ما تصبري شوية
الأم: أنا قلت قوم بينا نروح يا فوزي!
-مانتو قاعدين يا ماما شوية
الأم: لأ يا حبيبي أنا اتطمنت عليك خلاص..
**بعد ذهاب الأب و الأم**
-هدير، حسابنا كام؟
*كان 200 جنيه.. بس بعد الشخطة و قومي انجري دي، هزود 100 جنيه كمان
-يا هدير مش كنت لازم أسبك الدور!
*و سبكت الدور؟؟ ال 300 جنيه يا مصطفى!
-طب حاضر ماتشخطيش.. اتفضلي ال 300 جنيه اهم
*أيوة كده شاطر
_________________
مولاي صل وسلم دائما أبداعلى حبيبك خير الخلق كلهم
اللهم صل على هذا النبى الأمين وأجعلنا من خاصة المقربين لديه السعداء وعلى آله وسلم حق قدره ومقداره العظيم
|
المنتدى
التسجيل
الأسئلة المتكررة
بحث
