مليونية " حب رسول الله " صلى الله عليه وسلم .

ابو بكر · **مرسل:** الأربعاء يناير 30, 2013 6:56 pm

فيه حد فيكم يا أحباب حضر مليونية ؟؟ ... ما اظنش

طيب إيه رأيكم نعمل مليونية ..
يعنى ملناش نفس ولا إيه

نعمل منعملش ليه !!
بس مليونيتنا مش صراخ وعنف ودماء ..لا لا لا
ولا هي فى التحرير ولا محمد محمود ..
مليونيتنا شيء تانى خالص ..
مليونية حب .. حب لحبيب الله .. حب لرسول الله
مليونيتنا تذكية للأنفس وتنقية وتثبيت وتطهير للقلوب والافواه والألسنة ..
مليونيتنا تعمير للبيوت وتحصين للأبناء والأزواج والأهل .. الخ
مليونيتنا ستقابلنا فى القبر وتأخذ بيدنا عند الصراط وتقودنا إلى حوض الحبيب
مليونيتنا هى الصلاة على حضرة النبي مليون مرة
بحدادنى 30 ألف صلاة لكل فرد وبدون حد أقصى ..
مش كتير ولا صعب يا أحباب .. بالعكس طعمها ذى العسل وأحلى

الدعوة مفتوحه
ومش محدده بيوم معين ..
وكل واحد منا يصلى على النبي عدد مناسب وليكن 1000 مرة يدخل ويثبت ده ويكمل علشان يقوى نفسه ويشجع اخوانه .
وسيتم تجميع الاعداد كل فترة حتى نتم ال 1000000 ( مليون ) صلاة فى محبة حضرة النبي صلى الله عليه وسلم .
وقد بدأت بالفعل

وأثبت أننى صليت اليوم على حضرة النبى 1000 مرة... طريق الالف ميل يبدأ بخطوة ... يالا يا احباب رسول الله .. شاركوا فى مليونية الحبيب

الكرار · **مرسل:** الأربعاء يناير 30, 2013 7:36 pm

فكرة جميلة جدا جدا بارك الله فيك الأخ الفاصل أبو بكر وان شاء الله ياريت تقبلوني معاكم و مدد يا سيدنا النبي

الكرار · **مرسل:** الأربعاء يناير 30, 2013 8:34 pm

[size=200. الحمد لله أنا بدأت أنا و أفراد أسرتي و صليت. ع النبي ألف مره و كانت العمليه سهلي و يسيره جدا الحمد لله[/size]

المهاجرة · **مرسل:** الأربعاء يناير 30, 2013 8:59 pm

السلام عليكم ورحمة الله وبركاته

أخى أبو بكر فكرة جميلة والله جداً

وإن شاء الله معاكم فيها

إن شاء الله هكتب العدد اللى ربنا وفقنا فيه أنا وأسرتى

بعد إتمام العمل إن شاء الله وممكن نعيد العدد مرة تانى فى يوم آخر

ونجمع مع بعض إن شاء الله المليون يارب فى حب سيدنا وحبيبنا

رسول الله صلى الله عليه وسلم

جزاك الله خيراً يا أخى بجد وياريت

نجدد محبتنا لسيدنا النبى وأهل البيت بإستمرار على طول

ربنا ما يحرمناش منهم أبداً يارب

وتفضل محبتنا فى زيادة كل لمحة ونفس

حامد الديب · **مرسل:** الأربعاء يناير 30, 2013 9:40 pm

الفاضل السباق للخير دائما / ابو بكر

تخيلت وأنا أقرأ العنوان ثم أول سطور من مشاركه حضرتك انك تدعو اليها فى ميدان التحرير....؟؟؟

الله يعزك ويكرمك...

فكرتك جميله وجديده ومباركه ان شاء الله

وحاسس ان فى المستقبل القريب سينزل الشعب كله التحرير للصلاه على النبى والدعاء والابتهال الى الله

حتى ينير الميدان بانوار المصطفى الحبيب صلى الله عليه وسلم وتتنزل الرحمات لتزيل من على الميدان زخات الشر

وقى الله مصر شر الحادثات

ابو بكر · **مرسل:** الأربعاء يناير 30, 2013 11:47 pm

[size=200]سباق بالخير دائما يا اخى كرار ... لك من اسمك نصيب فى الخير

جزاك الله خيرا
وشكر جزيلا للاخت المهاجرة .. اعانك الله دائما على الطاعات وجعلك فى معية المهاجرين الأوائل .. أمين
مشكور د/ حامد على مرورك الكريم .. هى مليونية فعلا .. لكنها للتحرير .. وليست فى التحرير ، فقد هرمنا غلى التحرير

ولا نرى فى مليونياتهم جميعا خيرا .. هدانا الله واياهم وقيض لمصر من يحكم زمامها بالحق والعدل والحسم ... ونسأل الله تحفيف ما تأمل ونأمل جميعا وعجل بتفريج الكرب عن البلاد والعباد .. أمين

بالمناسبة .. صليت على النبى 2000

اجعلوا وقت قيادتكم للسيارة او ركوب المواصلات وأثناء التريض للصلاة على النبى..
وللاخوات الفضليات ذلك وأيضا أثناء تواجدهن فى المطبخ ... الاكل راح يبقاله نفس تانى خالص .. وبالهنا والشفا

يانور سيدنا النبى · **مرسل:** الأربعاء يناير 30, 2013 11:59 pm

معاكو يا احباب فى المليونية دى
والنبى هنصلى على النبى صلى الله عليه واله وصحبه وسلم

عبدالله ابن عبدالله · **مرسل:** الخميس يناير 31, 2013 12:27 am

اضحك الله سنك اخي الفاضل ابو بكر انا كنت خايف اخش علي الموضوع لتكون عايز تعمل مليونية في التحرير بجد

احنا مش بتوع مليونيات من دي ، ولكننا بتوع مليونيات الحب لا الكره

مليونية الصلاة علي اشرف الخلق اجمعين احلي مليونية ممكن نعملها

و الله ان الصلاة علي الحبيب تنقي النفس وتجعل المرء اقرب لله وللطاعات

الموضوع فعلا ليس صعب فاجعل السبحة ((وانا افضل السبحة الرقمية ))

معك دائما فحينما تستيقظ ابدأ يومك بالصلاة علي الحبيب وانت في الطريق للعمل صلي عليه

وانت عائد من العمل صلي عليه وانت تتابع الانترنت صلي عليه فاشغل حياتك بالصلاة عليه

وانا شاركت معكم ب 12 الف صلاة وردي اليومي لاني محب للصوفية و علي يقين بها ولكني بلا شيخ و

قد قرأت لمولانا الشريف محمود صبيح ان من كان بلا شيخ فالصلاة علي النبي هي شيخه

والحمد والشكر لله رب العالمين

حامد الديب · **مرسل:** الخميس يناير 31, 2013 12:51 am

جزى الله الاحباب كل الخير

ولى سؤال ماهى مميزات السبحه الرقميه ....؟؟؟

وايهما أفضل....؟؟؟

وما حكمها ايضا؟؟؟

عبدالله ابن عبدالله · **مرسل:** الخميس يناير 31, 2013 1:01 am

مقتطفات من كتاب مولانا الدكتور محمود صبيح حتي لا تحرم من رؤية النبي سيدنا محمد عليه افضل صلاة وازكي سلام وعلي اله وصحبه وذريته اجمعين وسلم

" فالصلاة علي النبي اخر الزمان عند انعدام او قلة المربين هي الشيخ المسلك وشيخ من لا شيخ له

كان لمعظم المسلمين ورد في الصلاة علي النبي صلي الله عليه وسلم فاقلهم كان يصلي عليه مائة مرة ، وبعضهم يصلي الفا وبعضهم يصلي ثلاثة ألاف في اليوم الواحد

اما المجتهدين فكانوا يصلون عليه بارقام تصل لعشرين الف او اربعين الف

وقال بعض الصالحين ان من داوم علي الصلاة علي النبي صلي الله عليه وسلم اثني عشر الف مرة في اليوم والليلة رأي النبي صلي الله عليه وسلم يقضة قبل ان تمر عليه ثلاثة

سنوات ، فالنبي صلي الله عليه وسلم يربي احبابه بالرؤيا وبشدة الصلاة عليه تتفتح اعين قلوبهم ويتولاهم النبي صلي الله عليه وسلم بالعناية والرعاية "

ابو بكر · **مرسل:** الخميس يناير 31, 2013 1:07 am

حامد الديب كتب:

جزى الله الاحباب كل الخير

ولى سؤال ماهى مميزات السبحه الرقميه ....؟؟؟

وايهما أفضل....؟؟؟

وما حكمها ايضا؟؟؟

من مميزات السبحة الرقمية أن الآخرين لا يشعرون بتسبيحك عليها ، لأنها تكون على هيئة خاتم بلاستيك يلبس فى الأصبع او ميدالية فى اليد .. ومن المعلوم ان من الاشياخ من يفضلون عدم اظهار السبحة الا امام الاخوان حتى لا يظهر المرء امام الناس فى صورة قد لا يكون اهلا لها .. قرأت ذلك للعارف بالله سيدى محمد زكى ابراهيم .. ومن هذا المنطلق تعتبر السبحة الالكترونية أفضل ..... وفى كل مع الاخلاص خير .. والله اعلم .

عبدالله ابن عبدالله · **مرسل:** الخميس يناير 31, 2013 1:09 am

السبحة الرقمية مزاياها جيدة من وجهة نظري اخي الفاضل / حامد الديب

اولا انت لا تشغل بالك بالعد فيكون تركيزك اكبر في التسبيح او الصلاة علي النبي صلي الله عليه وسلم

ثانيا هي صغيرة في اليد ولا تلفت الانظار وانا احب ذلك لكي اقي نفسي شبهة الرياء وقانا الله واياكم

وهي تكون مثل الخاتم حول اصبعك وبالتالي سهلة الحمل والاستخدام

اما في حكمها فانا لا اعلم واتركه لاهل العلم

ولكنها اسهل في الحمل والاستعمال

ابن أميرة · **مرسل:** الخميس يناير 31, 2013 7:50 am

حامد الديب كتب:

جزى الله الاحباب كل الخير

ولى سؤال ماهى مميزات السبحه الرقميه ....؟؟؟

وايهما أفضل....؟؟؟

وما حكمها ايضا؟؟؟

هذه المشاركة اهداء خاص لاخونا دانيال واعتذار ايضا له وللجميع على تقصيرى السابق.

الاخوة الافاضل تحية طيبة وبعد
حابدأ مشاركتى بنكتة .. واحد شاف واحد مهموم .. قال له ايه الهم دا كله !! .. المهموم قال له من الديون.. على ديون كتيرة ومش عارف اعمل ايه .. صاحبنا قال له من كده..!! بسيطة الامور... اعمل زيى .. المهموم قال له انت بتعمل ايه ؟.. قال له الدين يوم يقدم ما بسددوش .. المهموم قال له طيب والدين الجديد بتعمل فيه ايه ؟ قال له بانتظر لحد ما يقدم .. ايه علاقة النكتة بالموضوع حتفهموا فى الاخر ...
بصراحة انا متابع جيد للمنتدى المبارك من زماااان وبعد فترة حتى اشتركت كانت لحظات ليلة رأس سنة وكنت متضايق جدا وكنت طالع من سنة كئيبة وكنت متشائم من السنة الجديدة . .. قلت اشترك فى المنتدى المبارك علشان اتفاءل بالسنة الجديدة ببركة منتدى احباب سيدنا رسول الله صلى الله عليه وسلم .. يومها المشرف على الموقع رد على بهذه الرسالة الاعتيادية لكل مشترك جديد

"Date: Thursday, December 31, 2009, 11:16 PM
أهلا وسهلا بكم في منتدى موقع د. محمود صبيح
الرجاء الاحتفاظ بهذه الرسالة في مكان آمن. معلومات حسابك هي:
اسم المستخدم: ابن أميرة
كلمة السر:

شكرا لتسجيلك ومرحبا بك.
و شكرا
مشرف الموقع"

اول ما شفت التاريخ اتقبضت قلت يعنى السنة الكئيبة دى ورايا ورايا .. رحت ارسلت للمشرف رد على هذه الرسالة

" شكرا لقبولكم لنا لكن انا اشتركت لديكم فى اول ساعة من العام الجديد ليه الرد على بتاريخ سابق ..انتبهوا تاريخ اشنراكى 1 بنابر 2010 الساعة واحدة وربع تقريبا "

وفعلا تم التصحيح واكيد هو مش فاهم يومها ليه انا زعلت من الحكاية دى .. وتعمدت ما اشاركش خالص لاسباب كتيرة ..منها مثلا النت طبيعته ردود سريعة وانا كنت بأجر ساعة او اتنين فى نت كافيه .. ما تكفيش لنقاش .. اذا اختصرت لم يصل المعنى والتفصيل عايز وقت .. الصمت اجمل لا شك ... ونجحت فى مقاومة مشاركات كتيرة تلح وتسيطر على ... لحد ما اتورطت - ورطة خير - فى مشاركة ورا مشاركة .. لحد ما دخلت مشاركات لى فى اللى خايف منه - غول الوقت ودلالات الكلام - .. برغم النت حاليا متاح فى المنزل.. الا ان غول الوقت مشكلة .. بالاضافة ان بعض المشاركات لازم تدخل فيها حالة معايشة للفكرة اللى سيطرت عليك يوم كتبت نص الكلام الاولانى .. وممكن تكون اللحظة اللى فاضى فيها راكباك فكرة تانى وعايشها - الافكار حتى لو خير زى الشياطين بتركبنى برضه - ... المهم صرت مديونا بمشاركات تفصيلية لما طرحته .. والتفصيلية دى عايزة وقت ووقت ووقت ... وانا كتبت حاجات كتيرة والله من اللى فى رقبتى بس ما كملتش قلت مش حابعتها الا لما تكمل ... من بين المشاركات اللى كتبتها المشاركة اللى جاية دى كتبتها بعد رسالة الاخ دنيال الموجودة فى هذا الرابط
http://www.msobieh.com/akhtaa/viewtopic.php?f=4&t=10481
اللى قال فبها
دانيال كتب:
[align=center]السلام عليكم ورحمة الله وبركاتة

بداية كل عام وشيخنا الكريم الدكتور محمود

و كل اساتذتي في هذا المنتدي الطيب بالف خير

اعاد الله علينا وعلي الامة الاسلاميه هذة الايام الطيبة و المباركة بكل خير ووفقنا الي حج بيتة الكريم و زيارة نبينا المصطفي صلي الله علية وعلي الة وسلم

لدي استفسار اساتذتي وشيوخي الكرام

اريد ان اشتري سبحة

طلب غريب ( شوية طب ما تشتري يا عم اية المشكلة )

الموضوع

اني قرات في احد المواقع ان افضل السبح هي السبح الطبيعية سواء كانت من خشب اشجار او من عظام حيوان طاهر

وان السبح الصناعية المنتشرة غير مستحب التسبيح بها لوجود طاقة سالبة بها دخلتها اثناء التصنيع ومن المواد المصنع منها هذة السبح سواء كانت بلاستيكية او زجاجية

والحقيقة اخي يعيش في مكة المكرمة وابي ايضا ذهب لاداء فريضة الحج الاكبر اللهم اكنبها لنا

وقد سالوني ماذا اريد من هناك

فقلت اريد سبحة

لكن لا اعرف صراحة اي انواع السبح هي الافضل او ذات روحانيه اعلي اثناء التسبيح والذكر بها
بماذا تنصحوني

ما افضل انواع السبح الطبيعية ومن اي الاشجار اذا كانت من الخشب

الله يخليكم ممكن تفيدوني قبل ما موسم الحج ينتهي و يجبولي اي سبحة [/align]

تبارى الاخوة اكرمهم الله فى جعل المشاركة بحث جميل فى انواع السبح .. شعرت ان هذا البحث ينقصه السبحة الرقمية .. انتظرت حد يكتب كلمتين عنها مفيش .. قلت وجبت عليك يا ابن أميرة علشان الموضوع يبقى كامل .. كتبت واسرعت فى الخطى قبل الحجيج ما يرجعوا .. وعكت معاى كالعادة .. لحد ما فى يوم فوجئت الحجاج رجعوا .. زعلت بصراحة. . كانت ناقصة فيها حتة صغيورة وتكمل المشاركة .. وشعرت مالهوش داعى تتبعت .. حتبقى نكتة شوية .. لحد ما شفت الموضوع المبارك الخاص بالصلاة على سيدنا رسول الله بمليونية .. وشفت تعقيب اخونا حامد الديب ... شعرت انه احيا مشاركتى القديمة .. حانقله كوبى وبيست .. زى ما كتبته يومها من غير اى تعديل والله .
. وهو ضمنيا فيه اجابة على سؤال اخونا الفاضل حامد .. تعريف بها وحكمها انها سبحة مباركة والآن الى المشاركة القديمة كما هى :-

بالرغم ان فى رقبتى مشاركتين وجوبا متأخرتين الاولى هى تعقيب على تعقيب لاستاذنا الدكتور صبيح سبق ان قلت انى سأعقب بعد رمضان ولم أفعل والثانى توضيح للفاضل سهم النور وأخرين على تعليق كتبته بتركيز يحتاج تفصيل وتوضيح .. وكان الله فى عون اللى شايلين المنتدى دا على اكتافهم بكثرة المساهمات المفيدة والطويلة فالكتابة على لوحة المفاتيح مملة ولا تتناسب ابدا مع تدفق الافكار لدى .. وهما تعقيبين لا يجب الاختصار فيهما .. فمعذرة .. هذا التعقيب ليس تجاوز لما سبق .. سوف اكتبهما ان شاء الله.. لكن هذا تعقيب سريع تفرضه ضرورة ان تأتى الهدية للفاضل دنيال قبل عودة الحجيج ..

بالنسبة لما كتبه الافاضل مفيد وجميل لكن لا يكتمل الكلام عن السبحة دون ذكر النوع الحديث منها وهو الرقمى .. فالجوهر الاساسى فى السبحة واستخدامها ليس استمداد روحانية منها أو من خاماتها الجوهر الاساسى هو حل مشكلة ان الانسان مفيهوش غير 10 أصابع يعد عليهم .. ولما كان يريد ذكر الله بأكثر من ذلك .. فقد تحايل على ذلك باستخدام العقل فى الاصابع لتعطى له هذه الحيلة 30 عدد بدلا من عشر أعداد ... ولما اخترعت السبحة حلت أشكال العدد تماما .. بأنواعها المختلفة الصغيرة 33 حبة .. والمتوسطة 99 حبة .. ثم تفتق ذهن الصناع عن حيلة طريفة جعل فى آخرها خيط مستقل به عدد 10 حبات بحجم أصغر .. وهذا الخيط اعتبر عداد للسبحة ذات ال 99 حبة حيث ان الذاكر بمجرد ان يتم دورة كاملة من حبات السبحة ال 99 فيقوم بعدها بتحريك حبة صغيرة من الخيط المستقل .. وبهذه الحيلة يكون تضاعف حجم السبحة لتعد 1000 تقريبا , 99 حبة اساسية فى 10 مرات حبات العداد .. ثم صار الخيط الصغير ذو العشر حبات المسمى بالعداد خيطين كل منهما عشر حبات .. لتعطى فى الجملة عدد 10 آلاف تسبيحة ... حيث يستخدم العداد الثانى بعد انتهاء الأول .. ذو الالف .. ثم يصفر الاول - يعنى تعيد العشر حبات الى موضعهم الاصلى - ليبدأ من جديد حتى يصل الى عشرة آلاف فى النهاية... عند هذا الحد وقف تطور هذه المسبحة فيما يخص جوهرها وهو العدد وبقى التطوير فى نوع الخامة والأشكال الجمالية واحجام حبات الخرز لتتفق مع كل الاذواق .. حتى ان البعض يكون لديه العديد من المسابح تتناسب مع أطقم البدل التى يلبسها مثلها مثل الجوارب وليس لها اى قيمة لديه كتسبيح أو ذكر لله بها .
***

بالنسبة لى استخدم المسبحة مضطرا لكن لا احبها اطلاقا .. وما أشيلهاش معاى ابدا .. فقد رأيتها أول ما رأيتها فى ايدى الكذابين والافاقين .. يحملونها ويتخذونها لهم سمتا فكرهتها بكرهى لهم .. ولا استخدمها الا فى المنزل مع نفسى أو اضعها فى جيبى واستخدمها فى المسجد ثم أضعها فى جيبى مرة أخرى ولا أحملها فى يدى أبدا .. وحتى عندما رأيتها فى سمت الافاضل من الذاكرين من الصوفية كرهونى فيها أيضا ..حيث انى لما اشتريتها اشتريت واحده 99 بعداد واحد واخترتها ذات حجم صغير علشان جيب البنطلون وسهلة فى نقل حركة الخرز بين اصابعى وما يتحركش الخرز وحده واخترتها بلاستك علشان اخالف الصوفية فى موضوع روحانية الخشب هدفى الوحيد منها العدد وبس .. طلعت السبحة اللى بالمواصفات دى بها عدادين اشتريتها من باب الاثنين بسعر الواحد فقط .. لكن الاخوة الافاضل من الذاكرين من الصوفية ظنوا انى من أهل العدادين .. وانا راجل اهتماماتى كلها بالثقافة والقراءة وكل علاقتى بالسبحة هى هبات روحانية لتخفيف أحمال الذنوب بين الحين والحين ولدفع البلاء ... مش من أهل العدادين من المنقطعين الذاكرين .. لكن غالبا هم ما بيصدقوش .. بيعتبروك راجل بتخفى أحوالك .. فبقت السبحة دى حتى مع أهل الفضل تهمة وان كانت مدحك بما ليس فيك ... وبعدين لما لاحظت ان العداد وضبطه بيربك ويخرجك من الحالة الروحية علشان تظبط الخرزة خاصة بعدما يقدم الخيط تجد حبات العداد تدخل على بعضيها وتلخبط لك العدد .. مللت منها ووجدت أضل طريقة هى الزمن .. حسبت الاسغفار مثلا 100 مرة يأخد زمن كد ايه وهكذا كل ذكر .. ثم اجلس وأذكر بالدقائق دا ربع ساعة دا نصف ساعة وهكذا وجدتها طريقة جميلة جدا وأكثر روحانية خاصة لو ساعة كبيرة او منبه على حيطة امامك .. فتركت بها االمسبحة .
***

حتى كان يوم وجدت واحد فى الاتوبيس قابض على شئ وبيحرك فيه بيده ولسانه فى ذكر .. استاذنت منه وسألته عن الذى فى يده فقال مسبحة عداد .. قلت له يعنى ايه شرحها لى واعطاها لى جربتها وجدتها رائعة تحل كثير من مشكلات السبحة التقليدية بالنسبة لى سألته من أين شراؤها قال لى من السعودية .. وبحثت عنها فى القاهرة لم اجدها - يومها - وارسلت لاحد الاقارب بالسعودية واشتراها لى وارسلها لى وكانت جميلة جدا لكن فيها عيبين هينين الاول حجمها اللى مبعجر فى البنطلون والثانى الصوت العالى نسبيا فى هدوء شديد يعنى ايه يعنى يوم اكون فى سيدنا الحسين ولا السيدة زينب والمراوح شغالة ما حدش يسمع ليها صوت لكن المراوح لما تبطل يبتدى يتسمع لها صوت .. هى مؤدبة تقول فقط .. تك.. تك.. تك .. تك .. فقط.. لكن لان اللى جنبك ذاكر لله وفى حالة روحانية عالية بيسمعها ... طاخ طرا طاخ .. طاخ طرا طاخ .. طاخ طرا طاخ ... طبعا لازم اصدقه هو واكذب سمعى لان الهدوء حقه .. لكن غير ذلك ما فيهاش مشكلة .. وبعد فترة ضاعت منى غالبا وقعت من جيب البنطلون فى ميكروباص لانى دايما كانت تخرج منه واشيلها ..فتركتها واعتمدت الزمن واحيانا المسبحة ابو عداد .. ومرة معدى بجوار مولانا الحسين وجدت محل كاتب يوجد مسبحة عداد .. دخلت اشتريها.

***

وجدت مسبحة اخرى بعداد اخر هى التى فى الصورة .. بصراحة حبيتها من أول ننظرة وقع فى قلبى منها الفة شديدة .. شعرت انها تحل المشكلتين السابقتين وزيادة وزيادة وزيادة .. كونها فى حجم عقلة الاصبع تحل مشكلة الحجم للقديمة .. كونها تعتمد تقنية الشاشة الكريستال الرقمية تحل مشكلة الصوت .. شكلها شيك وأنيق وبلاستك - مثلا السابقة كان احيانا لما ندخل بوابة امنية لكشف المعادن زى بتاعة السكة الحديد أو معرض الكتاب ونخرج المعادن من جيوبنا زى المفاتيح والموبيلات حتى نعبر البوابة كانت دايما تلفت نظر الضابط ايه دى - شكلها ممكن تفجر بيها قنبلة - وصعب جدا ان تقنعه ان دى سبحة وان كانت مواقف نادرة معى.. لكن قد تكون اساسية بالنسبة لك عزيزى دنيال فى الغربة ... وسعرها رخيص جدا فى محلات حول سيدنا الحسين بالقاهرة ب 5 جنيهات مصرية اى 1 دولار الا 10 سنت وامام مسجد الفتح برمسيس ب 3جنيهات ونصف .. ومتوفرة بألوان عديدة كما بالصورة .. وهى لا تشعر احد حولك بها كأنها خاتم فى اصبعك .. وهى من حيث الارقام كسرت الرقم القياسى حيث عداده يصل الى مائة الف ... بس اللى جدع يلف لفة بيها ... اللى يلف كام لفة بيها يذهب الى هنااااااااااااااااااااااااااااااااااااااااااك هيث لا هنا ولا هناك ...وأجمل شئ فيها حتقفز بيك روحيا لارقام كبيرة لم تكن تذكر بيها من قبل .. ازاى مش علشان روحانية البلاستك طبعا .. ولكن عندما تبدأ صباحك بتصفير العداد عن طريق الزر الصغير ... وتأخذ وردك بيها أو ما تأخدش وتلصقها فى صباعك وتجد نفسك فى موقف انتظار لأتوبيس أو لمترو أو اشارة مرور طويلة أو طابور فى بنك او مكتب بريد أو طابور عيش أو طابور انبوبة بوتاجاز او طابور حجز تذاكر سفر أيام العيد أو انتظار لعمال مسجد حتى يفتحوا الباب لصلاة الفجر أو ..... أو ........ كل مواقف الانتظار السخيفة فى حياتنا والتى تستهلك بحق وحقيق أعمارنا تجد نفسك اشتغلت بالسبحة بأى ذكر تختاره .. ثم تأتى اخر اليوم وتبص فى الحصالة قصدى السبحة .. ياترى رزقنا الله ايه النهاردة من طاعته .. صدقنى ستفاجأ بالامر والرزق .. سوف تجد نفسك كسرت ربما لم تصل اليه وانت جالس بنية الذكر .. ولن تصدق انك ذكرت كل هذا .. ستشك فى السبحة .. ستضغط على الارقام امام عينيك ستجد انها مضبوطة لا تخرف الضغطة بزيادة رقم فقط .. ستكررها تانى يوم وثالث يوم .. وسوف تسعد بالحصيلة كل يوم ... وسوف تتولد فيك عادات جديدة .. سوف تجد فى يوم مثلا انها 900 فتجد نفسك تجلس قبل نومك لتكمل الالف او 1300 سوف تجلس لتكمل 1500 .. سوف تجد نفسك فى أيام الحصيلة قليلة مش زى كل يوم .. ستحزن على الحصيلة وقد تفرغ نفسك فى اليوم التالى لسد هذا العجز ... هذه سبحة مباركة حقا .. لكن يعيبها شئ واحد وهو هين سهل التغلب عليه .. يجب عليك ان كنت ستأخذ بها عدة أوراد فى نفس الوقت وتستخدمها فى العد يجب عليك ان تبدأ بالاطول فيهم فى الزمن وتجعل الأقصر هو آخر شئ

****

طبعا هى كاختراع آلة عد .. واحنا اسلمناها وخليناها سبحة ودا موقع الشركة المتخصص فى الات العد علشان اخونا الفاضل دانيال يشتريها باسمها .

http://www.tallycounterstore.com/Hand_Tally_Counter_p/001.htm

***

طبعا فيها حاجة صغيورة ناقصة فى آخر المشاركة .. اتركها لفطنتكم .. بس انا مش حاكتبها .. دى مشاركة خلصت على كده بنقصها .. لييييييه اقرأ الموضوع من أوله ... عرفتم ليه افتتحت المشاركة بالنكتة دى .
***

طبعا ما يصحش موضوع مبارك زى دا للفاضل المبارك أبو بكر يبقى مشاركتى فى السبحة بس .. كنت اتمنى اشارك زى ختمة القرآن بالقراءة معكم فقط مثل كثيرين شاركوا معكم بالقراءة فى نفس الموعد وبدؤها بقراءة الفاتحة لروح سيدنا رسول الله ولآل البيت ومن احبوهم من أهل الله وفى المقدمة د صبيح وان لم يسجلوا فى كشف الاسماء .. لكن هذه المشاركة لا اظن انى ساقدر والسبب اننى نويت بالفعل ان يكون البرنامج الخاص بشهر ربيع النور قراءة كتاب الحضرة بالكامل للشيخ صلاح القوصى وهو فيه 4 حضرات الحضرة الاولى ايات قرنية والحضرة الثانية ادعية نبوية والحضرة الثالثة ادعية صالحين ومجموع هؤلاء 44 صفحة صغيرة والحضرة الرابعة كلها صلوات على سيدنا رسول الله خاصة بالشيخ صلاح من ص45 حتى ص 215 من النسخة اللى معاى وهى صفحات قصيرة بعضها به 5 ابيات شعرية فقط ثم قراءة كتاب أنوار الحق فى الصلاة على سيد الخلق للعارف بالله عبد المقصود محمد سالم ثم الصلاة على النبى 1000 مرة .. نجحت فى هذا أول كام يوم ثم فشلت فى الايام التالية فى جمع الثلاثة ... فثبت حضرة الشيخ صلاح يوميا .. ثم احاول ان تكون انوار الحق يوم ايوة ويوم لا .. ويوميا من 100 الى 300 صلاة بصيغة متوسطة الطول ..وحاحاول افرغ يومين فى الاسبوع يكون الصلاة على النبى من1000 الى 2000 فى كل منهما .. لكنى افضل لنفسى الزمن وليس العدد .. اى لمدة نصف ساعة أو ساعة علشان اتغلب على ندالة نفسى التى ستختار صيغ قصيرة لتوفير الوقت .. وربنا يوفق ويعين ... و مشاركتى معكم ..ستقتصر على حكاية رؤية لأحد الافاضل اعرف انه ممن يرون سيدنا رسول الله واخوانه كذلك والححت عليه فى ان يحكى لى اى رؤية منه او من اخوانه فى الاحداث الجارية وكان هذا الكلام اكثر من سنة .. واخذ يلف ويدور على حتى لا يحكى وانا اتحايل عليه حتى قال لى أخيرا .. ان الشء الوحيد الذى اقدر ان اقوله لك ان... الأمر من سيدنا رسول الله ان "استعدوا لما هو قادم" سألت اخونا القادم شر قال لى نعم قلت له الاستعداد بأيه... قال لى ... سيدنا رسول الله قال "بذكر الله والصلاة علي".

[/b] يا عم حمزة ليه الالوان مش شغالة عندى خالص .. الالوان بتساعد فى التنسيق بدل السواد دا كله .. لازم اكتب الكود يدوى .. ولو عايز الكتابة تكون على سطر واسيب سطر اعملها ازاى خاصة انا باكتب فى ملف ورد وانسخ هنا .. بدايات الاسطر بتتلخبط منى وعايز اسيب سطر بدل الخنقة اللى فوق مش عارف ... والصور فى الاستعراض مش ظاهرة برغم عملت نفس الخطوات اللى قلت عليها فى رفع الصور .. ومعلش على الغتاتة دى كلها فى نفس واحد

.

ابو بكر · **مرسل:** الخميس يناير 31, 2013 5:33 pm

5000 صلاة على الحبيب :D

حامد الديب · **مرسل:** الجمعة فبراير 01, 2013 12:42 am

الفاضل /عبدالله ابن عبدالله
والفاضل/ ابوبكر
شكرا لكما ايها الاحباب على توضيحكما لمميزات السبحه الرقميه
جزاكم الله خير الجزاء
وهيا الى الصلاه على النبى صلى الله عليه وسلم

موقع د. محمود صبيح

مليونية " حب رسول الله " صلى الله عليه وسلم .

الموجودون الآن